Stoðþjónusta

Sérkennsla felur í sér verulega breytingu á námsmarkmiðum, námsefni, námsaðstæðum og/eða kennsluaðferðum miðað við skipulag námshópa á sama aldri. Sérkennsla er skipulögð til lengri eða skemmri tíma eftir þörfum nemandans, jafnvel alla skólagöngu hans. Sérkennsla er skilgreind á tvo vegu:

• Annars vegar sem almenn sérkennsla fyrir nemendur með almenna og sértæka námsörðugleika, svo sem í lestri, íslensku og stærðfræði; vegna hegðunarerfiðleika, röskunar á hreyfifærni og vegna mál– og talörðugleika. Almenn sérkennsla fer að mestu leyti fram í litlum námshópum í lengri eða skemmri tíma, allt eftir þörfum nemandans, í sérkennslustofum (Námsver – Skjól) eða í bekkjarstofu. Þar sem margir nemendur með námsörðugleika eru innan sama bekkjar er stuðningsfulltrúi oft nýttur til aðstoðar í einhverja tíma á viku undir stjórn umsjónarkennara
• Hins vegar er um að ræða sértæka sérkennslu og stuðning vegna nemenda með mikil frávik sem hafa veruleg áhrif á möguleika þeirra til að nýta sér nám í almennum skilningi. Þetta eru fjölfatlaðir nemendur, nemendur með alvarlega samskipta– og hegðunarörðugleika eða geðraskanir og eru greiningar á vanda þeirra komnar frá viðurkenndum greiningaraðilum. Sértæk sérkennsla er skipulögð fyrir þá nemendur sem fylgir sérstök úthlutun fjármagns út frá greiningu og þörf fyrir stuðning. Stoðþjónusta skólans metur og ákveður hvernig því er háttað. Þroskaþjálfar, sérkennarar og stuðningsfulltrúar sinna nemendum í sérkennslu/stuðningskennslu og vinna samkvæmt einstaklingsáætlun.